بسم الله

فى الأول كده لازم تعرفوا انى ماليش دعوة انا بس حبيت افضفض او افكر بصوت عالى يمكن التفكير ده يجيب نتيجة او الفضفضة يكون لها تأثير .

حكايتنا ها تكون عن الكلمات المصرية الصميمة " ماليش دعوة ، وانا مالى " وده طبعا لو احنا بنقولها وساعات بنسمعها " ياعم مالكش دعوة انت ، انت مالك " 

بصراحة حيرتنى الكلمات دى يعنى ايه ماليش دعوة ؟؟؟ يعنى بالعربى الفصيح الصريح انك لم يتم دعوتك على هذا الشأن ، والغريب ان فى الغالب بيكون الشأن يخص البلد او مايسمى بالشأن العام ، والسؤال بيفرض نفسه فرض ملح اذا كان كلنا ملناش دعوة امال من اللى وجهت له الدعوة ؟؟

هيا مصر دى مش بلدنا ولنا فيها ، والمفروض يكون لكل مواطن رأى فى اللى بيحصل ولا انا غلطان .... خدوا بالكو انا ماليش دعوة دى مجرد فضفضة .

يمكن الناس بتقول وانا مالى عشان خايفة ، وكمان كل واحد فيه اللى مكفيه ، واذاضغطت على اى مواطن على طول يجيب اللوم على الحكومة وتبقى هيا السبب فى كل حاجة ، حتى لوكانت الدنيا حر شوية تبقى الحكومة بنت ستين ف سبعين وهيا السبب ، والشعب مقهور وغلبان ودائماً يحمل الصفة النحوية مفعول به وعمره ابداً ما يفكر يبقى فاعل .... يظهر انه استحلى الموضوع .

طبعاً انا مش بدافع عن الحكومة بس اعتقد ان المسئولية مشتركة ... حلوة اعتقد دى .

المهم فى البوستات الجاية ها نخلى المواطن اللى مالوش دعوة يتوجه له دعوة ..... بس يارب هو يحضر